أنا مش عارف أبتدي منين ولا إزاي، بس بشكل عام أنا بكتب الموضوع ده كإحتجاج على حاجات كتير بيواجها الشباب في حياتهم، علشان نفضفض ونقول الي جوانا اشمعنا يعني بنات حوا هما الي واخدين راحتهم أوي في الكلام...
بغض النظر عن التفرقة العنصرية في التعامل مع الشباب بشكل عام والعزاب بشكل خاص كأننا كائنات من كوكب أخر و اننا بنشكل خطر على الأمن القومي وإزعاج لراحة البنات الي نازلة الشارع أصلا علشان تتعاكس بلبس لا يصلح إلا للإستخدام المنزلي (أنا أقصد فئة معينة مش الكل - وأي حواية هاتدخل الموضوع أنا بقلك أهو أنا لا أعمم يعني ما تاكليش دماغنا وتقولي ليه التعميم)، بحجة أن للعينات دي من البنات مطلق الحرية في إنها تلبس الي هيا عيزاه والشاب لازم يحط منتج جلدي قديم كده في بوئه و يسكت، وبحجة انها أي نعم حاطه 2 كيلو بوية ومسحوق طوب أحمر على وشها ولابسة طقم ولا أجدعها رقاصة بس معاها السيد الوالد الي مش دريان بعيشته أو غالبا فرحان بجاملها وبيعتبر نفسه لا يتكرر انه جاب بنوتة بالطعامة دي أو في وجود الوالده الفاضلة الي بتتباهى بإن بنتها ماشية في الشارع والعيون بتجري وراها (أنا مش عارف هما تفكيرهم إزاي بس في الغالب هايكون كده يا إما ما كانوش وافقوا على المهازل دي-أنا لا أعمم بس بتكلم عن ظاهرة منتشرة بشكل مش طبيعي وتوكا فاتحه موضوع خاص بالمشكلة دي) على كل حال ده مش صلب موضوعنا...
بغض النظر عن السجن أقصد الجيش، الي بيوصل لـ 3 سنين حبس قصدي تجنيد، والبنات أعدين في بيوتهم يتفرجوا على التلفزيون و يقصقصوا في ضوافرهم وبياكلوا التليفونات واحنا بعد الـ 3 سنين دول في تكوين نفس الي بيتمثل في شقة وفرش علشان الواحد يعرف يتجوز ويلاقي بيت يلمه ويتاويه بالإضافة لمصاريف الجواز نفسه الي بتتمثل في الشبكة وقاعة الفرح و الهدايا و وووووو، بغض النظر عن إن في شباب بيبتدي من الصفر بعد الجيش وفي شباب من تحت الصفر كمان عايشين حياتهم في سقيع أو شباب مقتدرين بس اتخنقوا من حياتهم ومن الي شافوه وبيشوفوه في حياتهم اليومية...
بغض النظر عن الكلام الي فات ده الي عايزله سنين علشان يتحقق بالنسبة للشباب الي ظروفها صعبة، و عايزله طولة بال وقدرة على التحكم بالنفس بالنسبة للمقتدرين، بغض النظر عن الحيرة والتشتت في إختيار شريكة الحياة خاصة وان كثير من البنات دماغها بقت لاسعة ومش بتفكر غير في لبسها وشكلها أو كل همها تستنى شريط تشامر حوستي لغاية ما ينزل علشان تعد تسمعه وتعلق البوستر الجديد في أوضتها...
بغض النظر عن ان المعاناة مش بتنتهي لحد كده لسه في ولاد والولاد عايزة مصاريف وعايزين مش عارف ايه وبيكبروا وكل ما بيكبروا مشاكلهم بتكبر معاهم و معاناتنا بتكبر أكتر، بغض النظر عن انه فوق كل ده وده يكون ربنا رازقه بواحده وريه الويل وسواد الليل في حياته...
بغض النظر عن كل شئ وأي شئ أنا بكتب الموضوع ده علشان كل شاب أو أي شاب سابقا يدخل يحكي عن مشاكله عن مواقف مر بيها أو خايف يمر بيها، عن نظرته لمستقبله، عن احساسه تجاه المجتمع، عن إحساسه بالإضطهاد من كل فئات البشر ان وجد، عشان نفضفض أحسن دي بقت حاجه تخنق...
أنا عن نفسي هابتدي أخر موقف حصلي حرق دمي كان إمبارح بعد اللقاء بتاعنا امبارح روحت البيت (الحمد لله في بيت بيلمني) وبما اني عايش في شقة عزاب وبما اننا لازم نقرف في بعض فامش عارفين نتلم على بعض ونخلص حوار التلاجة الي بقالنا 3 اسابيع عايشين من غيرها ومقضينها ميه معدنية، وبما اننا كنا امبارح عندنا أكل بيتي ودي حالة غير طبيعية وشاذة ان بيت عذاب يبقى فيه أكل بيتي و لأنه مفيش تلاجه مش هانروح نأجر 40 سنتي من تلاجة البقال، فكان لازم نسخن الأكل علشان ما يبوظش فاولعت على الأكل و الطبيعي اني نسيت ودخلت أنام و الأكل اتحرق و مش ده المهم. وطبيعي لما الأكل يتحرق انه يعمل دخان (دي من قوانين الطبيعة على فكرة) ومن قوانين الطبيعة أن الموضوع ده لازم يحصل مع أي شاب والغريب اني صحيت بعد ساعة ونص تقريبا وقال ايه افتكرت ورايح أشوف ايه الي حصل بس الحمد لله ربنا سترها وصاحبي كان جه ولحق الموضوع قبل ما الشقة ما تولع...
أتمتى أشوف ردودكم تقولوا الي جواكم تحكوا عن مواقفكم، أحسن نتجنن يا جماعة...
موضوع: مذكرات شباب مخنوق 
19.09.10 23:01
عدد المشاركات
أنا جنسيتي هي 
احترام القوانين
[/center]